ഒന്ന്- കേളി
സ്കൂൾവാൻ കാത്തുനിന്ന കുട്ടിയെ
ചായക്കടയിലെ വയസ്സനെ
ലേഡീസ്കംപാർട്മെന്റിലൊരുവളെ
മീൻമോപ്പഡിന്മേലൊരുവനെ
ഒരു പട്ടിയെ
കാക്കയെ
പ്രാർത്ഥിയ്ക്കുന്ന പ്രാണിയെ
പഴുതാരയെ
ശവത്തെ
മരത്തെ
കെട്ടിടത്തെ
വാക്കുകൊണ്ടു വെടിവെച്ചിട്ട്
കവിതയിൽ കോർത്തു തോളിലിട്ട്
അടുത്ത അരങ്ങിലേയ്ക്ക്
ഒറ്റപ്പാച്ചിൽ.
രണ്ട്- നവപദങ്ങൾ
1.
കവിത : (1) പത്രാധിപർക്ക്
എഴുതിയ ആളുടെ പേരിൽ
തുടങ്ങുകയും അവസാനിക്കുകയും ചെയ്യുന്നത്.
(2) പല തീവ്രവാദപ്പുണ്ണുകളെ
മറച്ച് മൊഞ്ചാക്കാനുള്ള
മിനുക്കുതൂവാല കസവുവേഷ്ടി.
2.
പ്രസിദ്ധീകരിക്കപ്പെട്ട
കവി : മുറിയൊഴിയുമ്പോൾ
ഒഴിമുറിയ്ക്കപ്പെടുന്നയാൾ.
3.
പ്രസിദ്ധീകരിക്കപ്പെടാത്ത
കവി : പ്രശസ്തന(യ)ല്ല
അതുകൊണ്ടു പ്രശസ്തന(യ)ല്ല എന്ന്
നിത്യം ജപിയ്ക്കുന്നയാൾ.
4.
ഫേസ്ബുക് : ജീവിച്ചിരിക്കുന്നു കവി എന്നതിന്റെ തെളിവ്.
5.
വിവർത്തനം.
: പാൻ ഇന്ത്യൻ ടിക്കറ്റ്
ആഗോള പാസ്പോർട്.
6.
കാമ / സൂത്രം : കവിതയും നിരൂപണവും തമ്മിലെ
വിവാഹജീവിതത്തിൽ ഇല്ലാത്തത്
ഒളിസേവയിൽ ഉള്ളത്.
7.
സംശയം :
കവിയ്ക്കും കവിയ്ക്കുമിടയിൽ ഉള്ളത്
കവിതയിൽ ഇല്ലാത്തത്.
8.
സാഹിത്യചർച്ച : കുടിയ്ക്കു മുൻപ്
കഴിയ്ക്കുന്നത്.
9.
ഞാൻ : അന്യജീവിതങ്ങളെ
ആവിഷ്ക്കരിക്കുമ്പോൾ
വരികൾക്കിടയിൽ
നൂറ്റൊന്നാവർത്തിക്കുന്നത്.
മൂന്ന്- ഒച്ചയും വിളിയും
എന്റെ കവിത ആരും പ്രസിദ്ധീകരിക്കുന്നില്ലോയ്
പ്രസിദ്ധീകരിച്ചത് ആരും വായിക്കുന്നില്ലോയ്
വായിച്ചവർ ആരും വിളിക്കുന്നില്ലോയ്
നിരൂപണമെഴുതുന്നില്ലോയ്
അവാർഡാരും തരുന്നില്ലോയ്
അവാർഡു കിട്ടുമ്പോൾ ആരുമറിയുന്നില്ലോയ്
ആ പരിപാടിയ്ക്കു വിളിച്ചില്ലോയ്
ഈ പരിപാടിയ്ക്കു വിളിച്ചോയ്
അവർക്കെന്നോടസൂയയാണോയ്
ഇവർക്കെന്നോടാരാരാധനയില്ലോയ്
ഓയ്......
നാല്- മംഗളം
ഇത്ഥമോരോന്നു
ചിന്തിച്ചിരിക്കവേ* -
* പൂന്താനത്തിന്റെ വരികൾ
നന്നായി ഹരികൃഷ്ണന് ....!
ReplyDeleteഹഹഹ
ReplyDeleteകുറിയ്ക്കുകൊള്ളുന്ന അമ്പുകള്
ഓയ്......
ReplyDeleteഇതു കൊള്ളാമേയ്...
ശുഭാശംസകൾ......
Nice One
ReplyDeleteBest wishes